Talış kəndi uğrunda şəhidlik zirvəsinə ucalan 19 yaşlı qəhrəman
Cəlal Ağahüseyn oğlu İslamov Vətən müharibəsində Talış kəndi uğrunda gedən döyüşlərdə şəhidlik zirvəsinə ucalıb.
“Övlad itkisi çox ağırdır. Amma şəhid anası olmaq qürurludur. Çünki Vətənimiz düşmən tapdağından azad olundu. Məktəbdə bütün tədbirlərdə bayraqdar Cəlal olardı. Məzun günü müəlliməsi ona bayrağımızı Şuşada dalğalandırmağı arzulayıb. Cəlal Qərbi Kaspi Universitetinin Kollecində təhsil alırdı. 18 yaşı tatam olanda hərbi xidmətə yollandı. Müharibə vaxtı əlaqə saxlayanda döyüşlərdə iştirak etdiyini bildirdi. Amma xahiş etdi ki, başqa heç nə soruşmayaq. Sonra şəhid olması xəbərini aldıq. Mən oğlumla qürur duyuram”,- deyə şəhidin anası Sevda İslamova söyləyib.
Cəlal İslamovun cəbhənin Suqovuşan və Talış istiqamətində döyüşlərdə iştirak edib. 19 yaşlı döyüşçü oktyabr ayının 7-də yaxınlığında artilleriya mərmisinin partlaması nəticəsində şəhidlik zirvəsinə ucalıb. Şəhid Cəlal İslamov doğulub boya-başa çatdığı Çarxı kəndində dəfn olunub. Çarxı kəndi Vətən müharibəsində iki şəhid verib.
İyulun 3-də ailəsi Cəlal İslamovun 20 yaşını qeyd edib.
“Mən qardaşımla fəxr edirəm. Cəlal Vətən yolunda şəhid olub. O mənim qardaşım, arxam, dayağım idi. Bütün şəhidlər mənim qardaşımdır. Onların hamısı ilə qürur duyuram. Allah onlara rəhmət eləsin. Onlar torpaqlarımız uğrunda şəhid olublar”, – deyə şəhidin bacısı Günel Məlikova söyləyib.
Qəhrəman əsgər ölümündən sonra “Vətən uğrunda” medalı ilə təltif olunub.
