“Deyirdi ki, şəhid olmaq ən böyük arzumdu…”-Şəhid tankçının həyat yoldaşı…

 

Bunu Moderator.az-a açıqlamasında Vətən müharibəsində şəhid olan İsmayıl Qasımovun həyat yoldaşı Məftunə xanım deyib. Şəhid hərbçimizin həyat yoldaşı İsmayılla bağlı xatirələrini bizimlə bölüşüb:

 

“İsmayıl 1989-cu il dekabrın 17-də Sumqayıt şəhərində anadan olub. Ailədə bir bacı və bir qardaş olublar. İsmayıl Vətən müharibəsinə könüllü yollandı. Özü əsgərlikdə tankçı olub. Qubadlıda və Füzulidə döyüşüb elə Füzuli uğrunda gedən döyüşlərdə də şəhid olub. Sentyabrın 21-də təlimlərə yollandı və ordan da müharibəyə getdi. Oktyabrın 9-da şəhid olsa da, 66 gündən sonra onun nəşi tapılıb. Dekabrın 10-da İkinci Fəxri Xiyabanda dəfn etdik”.

 

 

“İsmayıllı iki il idi ki, evliydik. O, döyüşə gedəndə qorxdum və dedik ki, İsmayıl, getmə. Dedi ki, “Məftunə yox, mən elə bu günü gözləyirdim”. Hərbi biletini götürüb döyüşə getdi. İsmayıl döyüşdə olanda sonuncu dəfə onunla oktyabrın 5-də danışdıq. Okatyabrın 8-də isə əlaqə kəsildi. 

 

İsmayılın dinə çox böyük həvəsi var idi, özü santexnik işləyirdi. Hacı Şahin Həsənliylə münasibətləri var idi. İsmayıl Vətən müharibəsində göstərdiyi qəhrəmanlıqlarına görə “Vətən uğrunda”, “Füzulinin azad olunmasına görə” və “Cəsur döyüşçü” medalları ilə təltif edilib. 

 

Sonuncu dəfə mənimlə danışanda İsmayıl dedi ki, “bizi irəli getmişdik və indi qayıtmışıq. Amma yenidən irəli gedirik, özünüzdən muğayat olun. Ola bilər ki, mənlə əlaqə saxlamaq mümkün olmadı, onda narahat olmayın”.  O, həmişə deyirdi ki, “şəhid olmaq ən böyük arzumdur. İmam Əli aşiqi idi. Xatirələrimiz coxdur. Son danışıqlarımızda namazlarıma daha çox diqqət etməyimi istədi. Elə bil ürəyinə dammışdı ki, şəhid olacaq. Amma bir yandan da, məni qorxutmaq istəmirdi. Zamanımızın imamını görməyi çox arzulayırdı. Deyirdi ki, görəsən qismət olacaq onu görmək? Elə mömin olmaq istəyirəm ki, kim nə etsə də, qəlbimə dəyməsin” . O qədər gözəl ürəyi var idi ki…”